14/12/2023.- Asturies, Cultura en Rede intensifica los díes vinientes la so programación del circuitu d’artes escéniques.

El vienres 15 d’avientu La Westia Producciones va representar Ada Byron: la tejedora de números en Siero, onde Ada, que ta mui mala, repasa la so propia vida, onde les matemátiques tienen un gran protagonismu; Teatro Casona va tar con Tararí en Gozón, un espectáculu onde un grupu d’internos nun manicomiu secuestra a los sos cuidadores y fáense pasar por cuerdos; Teatro del Norte va poner n’escena Macbeth, la traxedia de Shakespeare, en Llangréu; y El Jaleo Producciones Artística va llevar Swingers, una comedia onde los personaxes quiten la ropa y los prexuicios, a Navia.

El domingu 17 tóca-y la vez a Ḷḷena de disfrutar de Garfio & Cía d’ACAR Teatro del Mundo, y de les trampes del capitán Garfio y Smee pa quedase cola Relojería Campanilla; en Corvera, de Misery de Saltantes Teatro, l’adaptación teatral de William Goldman sobre la novela de Stephen King del mesmu nome; y en Mieres, d’Ellas de Oro d’Espectáculos Arlequina y La Líquida, una güeyada prestosa, interesante y emocionante a les muyeres más llibres y cultes de la so dómina.

L’axenda d’avientu del circuitu d’artes escéniques tamién incluye’l día 21, caLORCAlor de Guayominí Producciones en Navia; el día 22, Brujas de David Acera en Llaviana, Vuelve Raffaella d’El Jaleo Producciones n’Ayer y Cine María Cristina d’El Callejón del Gato en Siero; el día 26, Garfio & Cía de ACAR Teatro del Mundo en Muros de Nalón; el día 27, Engatusados de Tras la Puerta Títeres en Cuaña y Zozobra d’ACAR Teatro del Mundo n’Ayer; el día 28, El secreto de Julio Verne de Fantastique Company en Muros de Nalón y Garfio & Cía de ACAR Teatro del Mundo en Nava; el día 29, Cuento de Navidad de Saltantes Teatro en Llaviana y Luna de Luz de Gas Teatro en Villaviciosa; el día 30, Alquimia de José Armas Montes, el Ilusionista, en Villaviciosa.

La programación pue consultase n’asturiesculturaenrede.es. Los circuitos d’Asturies, Cultura en Rede son un proyectu de la Viceconseyería de Cultura, Política Llingüística y Deporte, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.