Últimos VídeosNoticies

16 espectáculos n’Escena en Rede, Muestra d’Artes Escéniques, en Llaboral Ciudá de la Cultura

Artes Escéniques

La muestra sectorial dedicada a les artes escéniques incluye funciones abiertes al públicu del 23 al 26 de mayu

76 persones inscribiéronse p’asistir a les actividaes de la Muestra, dirixíes a programadores, xestores culturales, compañíes, artistes y profesionales del sector

37 profesionales van participar nos alcuentros comerciales, 18 compañíes y artistes van presentar los sos trabayos en sesiones de poca duración y 46 persones van acudir a la xornada formativa sobre mediación nes artes escéniques

19/05/2023.- 16 espectáculos de compañíes y artistes asturianos van representase n’Escena en Rede, Muestra d’Artes Escéniques, que va celebrase del 23 al 26 de mayu en dellos espacios de Llaboral Ciudá de la Cultura.

El Teatru, la Sala de Pintures, el Paraninfu, la Sala 1, la Sala 2, el Patiu Dóricu y el Patiu de Comedies (Patiu de la ESAD) de la Llaboral van acoyer les obres programaes nesta muestra sectorial dedicada a les artes escéniques, qu’incluye producciones de Mar Rojo Teatro, Adrián Conde, Luz de Gas Teatro, Hipnótica Circo Teatro, ACAR Teatro del Mundo, Escena Vertiente, Teatro Plus, Guayominí Producciones, Carlos Alba “Cellero”, Teatro del Cuervo, El Callejón del Gato Producciones, Luz, Micro y Punto, Espectáculos Arlequina y la Líquida Teatro, Factoría Norte, Proyecto Piloto y La Sonrisa del Lagarto.

El públicu xeneral pue asistir y disfrutar de baldre de los espectáculos programaos n’Escena en Rede. Amás, más de 200 escolinos van dir a trés espectáculos abiertos a los centros educativos: Recuerdos d’Adrián Conde, Geometría del Alma de Teatro Plus y caLORCAlor de Guayominí Producciones.

Escena en Rede busca ser un llugar d’alcuentru profesional y comercial pa compañíes y profesionales asturianos, facilitando la comunicación, cooperación y intercambiu ente artistes, programadores y instituciones, pa lo que s’organizaron, amás de les representaciones, alcuentros comerciales, presentaciones a profesionales y una formación sobre mediación nel ámbitu de les artes escéniques. 76 persones inscribiéronse p’asistir a dalguna de les actividaes de la Muestra, dirixíes a programadores, xestores culturales, compañíes, artistes y profesionales del sector.

 

Alcuentros profesionales, xornada formativa y presentaciones

Los speed meeting o alcuentros comerciales ente compañíes y distribuyidores y programadores van reunir a 37 persones el martes 23 de mayu, a les 13:00 hores. Esi mesmu día, a les 16:45 hores, 46 profesionalse van asistir a la xornada formativa sobre Mediación. Esa práctica innovadora para los teatros y programes culturales locales, que va impartir l’artista y xestora cultural Caterina Varela. Esta mediación céntrase na práctica que rellaciona la obra, trayectoria o universu de los artistes colos espectadores, buscando elementos de conexón cola ciudadanía y dando valor a tolo que tien una obra d’arte, tanto a lo que vemos dientro del escenariu como a lo que queda fuera.

Caterina Varela desenvuelve la so carrera profesional nel campu de la danza y les artes vives, tanto na creación artística como na dirección y coordinación de proyectos de xestión cultural vinculaos a les residencies artístiques, la creación de públicos y la curaduría. Dirixe la compañía de danza La Macana dende va 15 años, ye la fundadora y directora del programa Residencies Paraísu del Colectivu RPM, foi la responsable de la Programación Espandida TRC Danza del Teatru Rosalía de Castro d’A Coruña y punxo en marcha’l proyectu Cara a unha escena plural.

Amás, el vienres 26 de mayu a les 13:00 hores, 18 compañíes y artistes van presentar los sos trabayos en sesiones de poca duración onde los creadores van poder mostrar los sos proyectos a programadores, distribuyidores y otros profesionales que vayan a la Muestra. Saltantes Teatro, Fantastique Company, El Jaleo Producciones Artísticas, Elisabet Martín Teatro, Producciones Viesqueswood, Palomica Lloca Producciones, La Westia Producciones, Higiénico Papel Teatro, Tras la Puerta Títeres, Susana Bermúdez Gudín, Kamante Teatro, Pompas y Pompones, Teatro Estudio Gijón, É Vero Teatro, Mago Martín, El Encuentro Teatro, Eunice Producciones y Meraki Cía. van participar nestes presentaciones d’Escena en Rede.

La Muestra d’Artes Escéniques faise nel marcu d’Asturies, Cultura en Rede, un proyectu de la Conseyería de Cultura, Política Llingüística y Turismu fechu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

 

Programa Escena en Rede, Muestra d’Artes Escéniques

Martes 23 de mayu

  • 09:00 hores. Sala 1. La biblioneta de Eme de Mar Rojo Teatro.
  • 10:15 hores. Teatru. Recuerdos d’Adrián Conde Espectáculos.
  • 11:45 hores. Sala de Pintures. Luna de Luz Gas Teatro.
  • 13:00 hores. Sala 2. Speed meetings.
  • 14:45 hores. Patiu de Comedies (Patiu de la ESAD). Expedición Las Nadies d’Hipnótica Circo Teatro.
  • 15:45 hores. Patiu Dóricu. Zozobra d’ACAR Teatro del Mundo.
  • 16:45 hores. Sala 3. Acción formativa.

 

Miércoles 24 de mayu

  • 09:00 hores. Sala 1. Un segundo para rezar o permítame un segundo para vomitar d’Escena Vertiente.
  • 10:15 hores. Teatru. Geometría del alma de Teatro Plus.
  • 11:45 hores. Sala de Pintures. caLORCAlor de Guayominí Producciones.
  • 13:00 hores. Paraninf. El trasgu y el molineru de Carlos Alba “Cellero”.

 

Xueves 25 de mayu

  • 09:00 hores. Sala 1. Orsai de Teatro del Cuervo. Sala 1.
  • 10:15 hores. Teatru. Cine María Cristina d’El Callejón del Gato Producciones.
  • 11:45 hores. Sala de Pintures. Celeste de Luz, micro y punto.
  • 13:00 hores. Paraninfu. Ellas de oro d’Espectáculos Arlequina y La Líquida Teatro.

 

Vienres 26 de mayu

  • 09:00 hores. Sala 1. The Asturian Sisters de Factoría Norte. Sala 1.
  • 10:15 hores. Teatru. La bestia negra de Proyecto Piloto.
  • 11:45 hores. Sala de Pintures. Ohiá de La Sonrisa del Lagarto.
  • 13:00 hores. Paraninfu. Presentaciones profesionales.

 

El públicu xeneral pue asistir a los espectáculos programaos. La entrada ye llibre hasta enllenar l’aforu.

Los speed meetings, la sesión formativa y les presentaciones tán dirixíes namás a públicu profesional y yá se zarraron les inscripciones pa participar.

Slide 2