El ciclu de cine itinerante de Llaboral Cinemateca ufierta esta primavera, con entrada de baldre y en versión orixinal subtitulada n’español, 99 proyecciones nun total de 29 sedes

La cartelera fórmenla los llargumetraxes El Planeta d’Amalia Ulman, Sedimentos d’Adrián Silvestre, Las cartas de amor no existen de Jérome Bonell y la escoyeta de curtios asturianos Llaboral Cinemateca

18/04/2022.- Los conceyos de Mieres y Sobrescobiu súmense esti trimestre al programa de cine itinerante La Cinemateca Ambulante de Llaboral Cinemateca, qu’esta primavera ufierta, con entrada gratuita, títulos d’estrena recién o qu’entá nun llegaron a les sales asturianes. La Cinemateca Ambulante ye’l ciclu de cine itinerante de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica ufiertada por La Cinemateca Ambulante ta coordinada pol Festival Internacional de Cine de Xixón y esti trimestre tamién cunta cola collaboración del Festival de Cine LGTBI del Centru Niemeyer.

Cola adhesión al programa de Mieres y Sobrescobiu, el ciclu amplía’l circuitu a 24 conceyos, ufiertando 99 proyecciones del meyor cine contemporaneu en versión orixinal subtitulada, nun apueste nuevu pola collaboración ente’l Gobiernu del Principáu y los conceyos asturianos. Collaboren tamién nesta ocasión los conceyos de Cabrales, Cangues d’Onís, Cangas del Narcea, Castrillón, Colunga, Gozón, Llangréu, Ḷḷena, Llanera, Llanes, Nava, Navia, Noreña, Piloña, Ribadeva, Ribeseya, Siero, Sotu’l Barcu, Tinéu, Valdés, A Veiga y Villaviciosa.

Arrinca la programación de primavera esti 19 d’abril en Cangues d’Onís cola proyección de Sedimentos, la última película d’Adrián Silvestre, que llevó’l Premiu Feroz Arrebato de Non Ficción 2021 y que va rodar per Asturies de la mano del Festival de Cine LGTBI del Centru Niemeyer. Amás, cola collaboración de XEGA Asturies, van ufiertase charles y alcuentros coincidiendo con delles de les cites.

En Sedimentos, seis muyeres trans viaxen a un pueblín lleonés onde van esplorar paisaxes insólitos, amás de los rellabicos de la so propia personalidá. Buscando respuestes sobre aquello que les axunta como grupu, van deprender a bregar coles sos diferencies. Frescura, sensibilidá, empatía y cero prexuicios nesta road-movie emotiva y prestosa que trunfó en festivales como la Seminci, Los Angeles, Marsella o Toulouse.

Estrenada apocayá n’España, llega a La Cinemateca Ambulante la comedia romántica Las cartas de amor no existen, del cineasta francés Jérome Bonell. Jonas ye un parisín de cuarenta y tantos que sigue namoráu perdíu de la so ex, Léa. Depués d’una nueche d’enfile, píca-y a la puerta pa confesa-y los sos sentimientos, pero ella refúgalu. Despreciáu, acaba na cafetería de debaxo de so casa y empieza a escribi-y una carta d’amor, escaeciendo tolo que tenía que facer esi día.

Cola ayuda d’un camareru prestosu y dellos vecinos del barriu, Jonas va encarase coles sos rellaciones pasaes, con un futuru inciertu y, sobre manera, con él mesmu. Lo qu’empieza siendo un intentu crucial de recuperar a la que foi la so moza, va convertise en toa una reflexón sobre la so vida.

Cine #FechoNAsturies en La Cinemateca Ambulante

L’artista multidisciplinar arxentina Amalia Ulman protagoniza con so ma’l so debut llargu El Planeta, una película en clave de comedia negra, rodada en blanco y negro y que trescurre dafechu n’escenarios de Xixón, la ciudá que la vio medrar y que considera so casa.

Depués de la muerte de so pá, Leo dexa la so vida como estudiante de moda en Londres y vuelve al so Xixón de nacencia, onde so madre ta a puntu de que la desalluguen de casa. Dambes axúntense na so desgracia mentes urden, engañen y estafen pa llograr un estilu de vida perriba de les sos posibilidaes.

Completen la cartelera d’esti trimestre en La Cinemateca Ambulante cuatro curtiumetraxes que formen parte del catálogu Llaboral Cinemateca Curtios, nuna sesión diversa, áxil y apasionante, onde tienen acoyida’l documental y la ficción y qu’apuesta, sobre manera, polos talentos asturianos.

Conformen esti programa los curtios La colcha y la madre de David P. Sañudo, Los Ladrillos de Tito Montero, Moru d’Ángeles Muñiz Cachón y Nyami Nyami de David Rodríguez Muñiz.

Información completa de les proyecciones, feches y horarios na web www.laboralcinemateca.es