L’itinerariu patrimonial nuevu patrimonial, que surde pola mor de les efemérides de la batalla del Real Sitiu y l'entamu de la construcción de la catedral d'Uviéu, percuerre 200 quilómetros hasta Santu Toribio de Llébana, en Cantabria

La iniciativa súmase a la programación d’Asturies, cultura en rede, que les sos convocatories pa recibir propuestes d'actividaes pal segundu semestre yá tán abiertes

22/03/2022.- La Conseyería de Cultura, Política Llingüística y Turismu impulsa'l nuevu circuitu cultural Cuadonga 2022 - Camín de los Santuarios. La iniciativa enmárcase nel programa Asturies, cultura en rede y surde no que fai a la conmemoración de dos efemérides fundamentales pal Camín de Santiago: per un llau, el 1.300 aniversariu de la batalla de Cuadonga y, d’otru, l'entamu va 1.200 años de la construcción de la catedral de San Salvador, n'Uviéu.

La convocatoria pa la recoyida de propuestes acaba de abrir y les actividaes escoyíes van programase nel segundu semestre.

L'itinerariu patrimonial ponse en marcha coles mires de xunir Cuadonga y la catedral uvieina col monesteriu de Santu Toribio de Llébana, en Cantabria, al traviés de 200 quilómetros de percorríu. Nel trayectu hai diversos cenobios y santuarios (Santa María de la Vega, n'Uviéu; Santa María la Mayor, en Nava; la Virxe de la Cueva, en Piloña, o San Pedru de Villanueva, en Cangues d'Onís), ilesies romániques (San Martín d'Argüeyes, Santa Olaya de Abamia, Santa María de Llas o San Pedro de Plecín), delles pontes d'aniciu medieval, bayura de patrimoniu etnográficu y espacios de munchu valor paisaxísticu.

Pa divulgar y promocionar el patrimoniu material y inmaterial de Cuadonga 2022 - Camín de los santuarios al so pasu pel Principáu, créase esti circuitu nuevu, nel que van tener cabida propuestes rellacionaes coles artes escéniques, la música, la cultura tradicional, la lliteratura y l'espardimientu de les lletres o les artes visuales que se desenvuelvan nos conceyos qu'integren esti itinerariu: Cabrales, Cangues d'Onís, Nava, Uviéu, Onís, El Valle Altu de Peñamellera, Piloña y Siero.

Otros ciclos

Ta acabante d’abrir tamién la convocatoria de los circuitos d’Asturies, cultura en rede dedicaos a artes escéniques, música, lliteratura, cultura tradicional, Xacobéu y artes visuales pa la ellaboración d'un catálogu temáticu de cada disciplina que va ponese a disposición de los conceyos que participen nesta iniciativa pa qu'escueyan los proyectos que quieran incorporar a la so programación.

Nel casu de los circuitos d'artes escéniques, música, lliteratura, cultura tradicional y Xacobéu, les actividaes van llevase a cabu ente'l 1 de xunetu y el 31 d'avientu. Nel circuitu d'artes visuales, los proyectos van desenvolvese en dos fases: el diseñu, desenvolvimientu y producción va llevase alantre primero del 31 d'avientu d'anguaño y la exhibición, a partir del 1 de xineru de 2023, con una duración mínima d'un mes por sede o conceyu.

Les bases pa les convocatories pueden consultase na web www.asturiesculturaenrede.es.

Les solicitúes pa los circuitos d'artes escéniques, música, lliteratura, cultura tradicional, Xacobéu y Cuadonga 2022-Camín de los santuarios han presentase primero de les 14:00 hores del 22 d'abril, y pal circuitu d'artes visuales, primero de les 14:00 hores del 22 de mayu.

Los circuitos d’Asturies, cultura en rede son un proyectu de la Conseyería de Cultura, Política Llingüística y Turismu, realizáu en collaboración colos conceyos y xestionáu pola Sociedá Pública de Xestión y Promoción Turística y Cultural del Principáu.