Los circuitos d’artes escéniques, música, lliteratura, narración oral, cultura tradicional y cultura sidrera caltienen abierta la presentación de proyectos hasta’l 13 d’ochobre, y artes visuales, hasta’l 30 de payares

Escena en Rede va axuntar del 27 al 29 d’ochobre na Llaboral espectáculos, formación y alcuentros ente compañíes, artistes, programadores y instituciones

La Rede de Teatros y Auditorios creada apocayá va escoyer la so primer programación, que va llegar a los conceyos ente avientu del 2026 y xunu del 2027

09/10/2026.- La conseyera de Cultura, Política Llingüística y Deporte, Vanessa Gutiérrez, presentó güei la imaxe nueva d’Asturies, Cultura en Rede, el programa de cooperación cultural del Principáu y los conceyos que lleva espectáculos, esposiciones y otres actividaes a conceyos de toa Asturies. La presentación coincide con delles convocatories abiertes anguaño pa los circuitos culturales y pa la Rede de Teatros y Auditorios del Principáu d’Asturies (RETEA) y una edición nueva d’Escena en Rede, la muestra profesional dedicada a les artes escéniques.

La identidá visual nueva parte precisamente de la idea que da sentíu al programa: crear una rede que conecte cultura y territoriu. El diseño axunta conceptos como la comunicación, la conexón y Asturies pa representar les rellaciones que s’establecen ente creadores, proyectos, espacios culturales, conceyos y públicos de puntos variaos de la comunidá.

Asturies, Cultura en Rede ye un programa de cooperación cofinanciáu ente’l Principáu y los Conceyos que facilita qu’espectáculos, esposiciones y otres propuestes culturales viaxen per dellos conceyos. Los proyectos escuéyense pente medies de convocatories públiques y pasen a formar parte de catálogos dixitales. Son depués los Conceyos adheríos los qu’escueyen les actividaes que quieren incorporar a les sos programaciones, averando asina propuestes de disciplines variaes a los sos vecinos y vecines. La rede abarca circuitos dedicaos a artes escéniques, artes visuales, música, cine, lliteratura, cultura tradicional, cultura sidrera y narración oral, amás d’iniciatives específiques como Autores nel Camín o la Xira Didáctica.

Les convocatories que queden abiertes estos díes van dexar conformar los catálogos venideros d’Asturies, Cultura en Rede. El 13 d’ochobre remata’l plazu pa presentar proyectos d’artes escéniques, música, lliteratura, narración oral, cultura tradicional y cultura sidrera. N’artes visuales, onde s’escueyen propuestes espositives inédites pa la so producción y exhibición depués n’espacios culturales variaos, el plazu va quedar abiertu hasta’l 30 de payares. Les actividaes escoyíes van programase ente xineru y xunu del 2027.

Primer programación de RETEA

A esti mapa cultural incorpórase RETEA, la estructura nueva de collaboración ente los teatros y auditorios principales d’Asturies pa favorecer una ufierta estable d’artes escéniques y música. La so primer convocatoria ta abierta hasta’l 13 d’ochobre pa compañíes, productores y distribuidores, que pueden presentar propuestes de teatru, danza, música, circu, maxa, teatru d’oxetos o títeres y proyectos multidisciplinares.

La convocatoria ta abierta tamién a compañíes y promotores de fora d'Asturies, anque establez un compromisu específicu col texíu cultural de la comunidá, el 70 por cientu de los espectáculos contrataos tendrá de corresponder a compañíes asturianes.

Cada espectáculu va tener que cumplir les condiciones técniques recoyíes na convocatoria, amás de los espacios onde se lleven a cabu. Coles propuestes escoyíes va ellaborase un catálogu dixital que va tar a disposición de los Conceyos cola infraestructura necesaria y que decidan incorporase a la rede. Cada Conceyu va poder escoyer los espectáculos que quiera llevar a los sos escenarios dientro d’una programación que se va desenvolver ente’l 18 d’avientu del 2026 y el 30 de xunu del 2027.

Escena en Rede: escenariu y puntu d’alcuentru

Ochobre va tener otra de les sos cites na cuarta edición d’Escena en Rede, Muestra d’Artes Escéniques, entamada pola conseyería en collaboración con EscenAsturias y que se va celebrar del 27 al 29 en dellos espacios de Llaboral Ciudá de la Cultura. A lo llargo de trés díes, la muestra va combinar los espectáculos abiertos al públicu con formación, debate y espacios pensaos pa favorecer l’alcuentru ente compañíes, artistes, programadores y instituciones.

La programación axunta propuestes de Proyecto Piloto, Circo Bajo el Tejado, ACAR Teatro, Dana Raz, Saltantes Teatro, Teatro del Cuervo, Higiénico Papel Teatro, Guayominí, Norbayu, El Callejón del Gato, Popy Vegas Teatro y MonoEscena. Teatru, danza y circu van ocupar espacios interiores y esteriores de la Llaboral, con representaciones d’accesu llibre y gratuitu hasta completar aforu.

L’alcuentru profesional va empezar primero de que se llevante’l telón de la muestra. Los díes 14 y 15 d’ochobre van celebrase dos formaciones intensives dedicaes al financiamientu autonómicu de les artes escéniques y a les ferramientes pa cuntar, posicionar y conectar los proyectos escénicos colos sos públicos nel entornu dixital. Les inscripciones pa dambes sesiones queden abiertes.

Yá a lo llargo d’Escena en Rede, trés meses redondes van abrir la conversación sobre les residencies artístiques, la situación y los retos de la distribución y les posibilidaes de texer redes y aliances fuera d’Asturies p’ampliar el percorríu de los proyectos escénicos. Artistes, programadores y instituciones pueden inscribise nes actividaes profesionales hasta’l 23 d’ochobre a les 14:00 hores.

La imaxe nueva d’Asturies, Cultura en Rede va acompañar dende agora estes convocatories y actividaes baxo una identidá común. El símbolu cambia, pero queda’l principiu que sostién el programa: cooperar pa que la cultura circule, llegue a más sitios y forme parte de la vida cotidiana de los conceyos. Una rede que da percorríu a la creación y fai efectivu’l derechu de la ciudadanía a acceder y participar na cultura, viva onde viva.